A rede CRUSOE, como socio afiliado de ECHOES (European Cloud for Heritage Open Science), anuncia que tanto a consulta ECHOES Consultation como a primeira convocatoria do programa de subvencións ECHOES Cascading Grants Programme están oficialmente abertas e dispoñibles no sitio web de ECHOES.
ECHOES Consultation: dar forma á Nube do Patrimonio Cultural
A consulta ECHOES Consultation ten como obxectivo cartografar as diversas comunidades do Patrimonio Cultural e coñecer as súas necesidades e expectativas en relación coa Nube do mesmo. As achegas dos participantes serán fundamentais para configurar unha infraestrutura, ferramentas, servizos e esforzos de capacitación que respondan as necesidades das comunidades.
Como primeiro paso, lanzouse un cuestionario en liña dirixido a identificar a profesionais e investigadores deste ámbito, así como a explorar o uso de ferramentas dixitais no seu traballo diario. Os resultados desta consulta guiarán o desenvolvemento da Nube, creando un espazo útil e accesible para todos.
Poderán participar todos aqueles interesados no Patrimonio Cultural, incluídos profesionais, investigadores, informáticos, desenvolvedores, institucións e organizacións.
O cuestionario estará dispoñible ata abril de 2025.
ECHOES Cascading Grants Programme: unha oportunidade de financiamento
A primeira convocatoria do programa de subvencións ECHOES Cascading Grants Programme está deseñada para apoiar ás institucións do Patrimonio Cultural (CHIs) na contribución de conxuntos de datos que serán utilizados dentro da Nube do Patrimonio Cultural. As propostas deben definir a comunidade de usuarios á que se destina o conxunto de datos, a súa finalidade, os resultados esperados e os beneficios xerais. Os solicitantes tamén deben describir como prevén utilizar a Nube para o seu proxecto.
O financiamento é de ata 60.000 € para un máximo de 12 proxectos. A ela poderá optar calquera CHI con sede nun país de Horizonte Europa, xa sexa de forma independente ou como socio principal dun consorcio. Anímase especialmente a postular a CHIs pequenas, medianas e con menos recursos, así como a consorcios interdisciplinarios.
As propostas deben ser enviadas antes do 15 de maio de 2025 (23:59 CEST) a través da plataforma de presentación que se abrirá en abril de 2025 e, nas próximas semanas, organizarase unha xornada informativa para resolver dúbidas.
Podes atopar máis detalles, incluída a Guía do Solicitante completa, nesta ligazón.
Decídete a formar parte deste proxecto!
