CRUSOE, a través da Cátedra Institucional de Patrimonio Cultural Dixital, forma parte dun dos consorcios que se presentan á convocatoria aberta Ecosistemas de Innovación Interconectados (European Innovation Ecosystems).
O obxectivo deste proxecto, impulsado pola Comisión Europea, é iniciar un diálogo que permita facilitar un acordo entre Estados membros e os Países asociados da UE para avanzar cara uns ecosistemas de innovación dinámicos, inclusivos e conectados.
Este concepto refírese a un grupo de actores locais e procesos dinámicos que producen solucións a diferentes desafíos e retos conxuntos.
Deste xeito, a convocatoria busca promover o deseño de políticas de planificación, implementación e investimentos conxuntas nas diferentes áreas descritas na Nova Axenda Europea de Innovación (NEIA), documento que busca situar a Europa á vangarda nesta materia a través do desenvolvemento de novas tecnoloxías.
Isto traducirase en programas e plans de acción a longo prazo para fomentar a colaboración en iniciativas de apoio á innovación, a través da creación de activos de coñecemento entre os ecosistemas de innovación da UE, nacionais, rexionais e locais.
A convocatoria pretende garantir a inclusión de tódolos actores clave da innovación do modelo de cuádrupla hélice (representación académica, da administración pública, a empresa e a sociedade civil) e tódolos territorios da UE, incluídas as zonas rurais.
Finalmente, fomentarase a construción de sinerxías entre diferentes programas de financiamento da UE, como os instrumentos financeiros da Política de Cohesión ou o chamado Mecanismo de Recuperación e Resiliencia, entre outras posibilidades.
Podes consultar os pormenores desta convocatoria da Comisión Europea a través desta ligazón.
