Fotografía de Xavi Gantes.
O Arquivo Histórico da Universidade de Santiago de Compostela (USC) foi o epicentro da celebración da xornada “O Patrimonio Cultural e os procesos de transformación dixital: o impacto da Intelixencia Artificial” o 29 de abril, impulsada polo programa Stellae 5.0 baixo o auspicio de CRUSOE.
O evento reuniu a líderes e expertos de diversos campos para discutir o impacto da IA na preservación e manexo do patrimonio. Está enmarcado dentro das actividades coordinadas pola Cátedra Institucional de Patrimonio Cultural Dixital, con sede no Centro de Investigación Interuniversitario dos Países Atlánticos Culturais (CISPAC) da USC.
O propósito da xornada foi compartir perspectivas variadas sobre como a intelixencia artificial está a transformar a xestión de arquivos e o patrimonio documental. A dixitalización converteuse nun elemento central de cambio e innovación en economía e na sociedade no seu conxunto e o patrimonio cultural non é unha excepción.
Entre as tecnoloxías de vangarda, a IA destaca como unha das máis influentes. A capacidade de automatizar procesos e mellorar a descrición e contextualización dos documentos abre novas posibilidades e desafíos que deben ser explorados e comprendidos desde diversas perspectivas.
O acto foi presidido pola secretaria xeral da USC, Dulce María García Mella, e contou coa asistencia da asesora do Ministerio de Transformación Dixital e Función Pública, Mar Pérez Morillo; a subdirectora xeral de Arquivos Estatais do Ministerio de Cultura, Ana Mª López; o profesor da Universidade de Vigo e CEO da start up IMPULSSE, Javier Martínez; o director do sector público e sanidade de NTT Data, Pablo Manzano; e o director científico da Cátedra de Patrimonio Cultural Dixital impulsada por CRUSOE, Juan Castro.
Ademais, sumáronse voces de diversos sectores relacionados co patrimonio cultural dixital, o turismo, as TIC e o audiovisual, así como académicos das tres universidades públicas de Galicia e responsables de arquivos destacados.
Tras as presentacións, os asistentes participaron nun animado intercambio de ideas sobre temas relevantes, como a evolución das habilidades e perfís profesionais necesarios, a sustentabilidade económica da transformación dixital do patrimonio, estratexias de difusión do acervo patrimonial e a importancia dos enfoques multidisciplinarios e colaborativos. O evento concluíu cunhas palabras do presidente executivo da Secretaría Xeral Técnica de CRUSOE, D. Salustiano Mato.
